الشريك المعيوب .. بقلم: هند عبد الغنى

الشريك المعيوب …
كتبت هند عبد الغنى

ناس اتجوزت جواز تقليدى ( جواز صالونات ) وكتير منهم فشلوا واكدوا ان السبب ان مكنش بينهم قصة حب تقربهم وتعرفهم على بعض اكتر …
وناس اتجوزوا بعد قصة حب عنيفة وطول انتظار لكن للاسف برده فشلوا وقالوا اننا كنا غلط وكان لازم يكون بيننا مسافات امان …
ناس غنية ماديا اتجوزوا وفشلوا وقالوا يابخت الفقير اللى اكيد متهنى لانه مفيش حيلته الا القلب والمشاعر
وناس فقيرة ماديا اتجوزوا وفشلوا وقالوا يابخت الاغنياء اكيد مش ناقصهم حاجة ….
راجل اتجوز واحدة صغيرة وفشل علشان معندهاش خبرة بالحياة
وراجل اتجوز واحدة اكبر منه وفشل وقال علشان مش حاسس معاها بتبادل المشاعر اللى اتمنيتها
واحدة اتجوزت الغنى وفقدت راحة البال والحب والمشاعر
وواحدة اتجوزت الفقير وفقدت كل ملذات الحياة …
الخلاصة …ربنا مخلقش انسان كامل
العيوب والخطأ من سمات البشر
وان السبب للنجاح والفشل بعد توفيق ربنا هو التقبل وتغافل العيوب والرضا بقدر الله ان كانت هناك الاستطاعة للتقبل
دايما بنسمع اقبل صاحبك على عيبه
طيب ماالاولى اقبل الشريك على عيبه
طيب لو الشريك فيه عيوب انا مش قادر اتقبلها !!!؟؟؟
طيب حقولك الحل بس حط الجملة دى الاول دايما ف ذهنك ..
” لا تسمح للقبيح ان يسرق منك المليح ”
يعنى بلاش تسمح للشخص السئ يحول الحلو والجميل اللى فيك لقبيح شبهه
النبى عليه الصلاة والسلام عملك منهج لمشكلتك..وضعلك ٣ حلول تختار من بينهم حل يناسبك
اما تصبر واما تصلح واما تفارق
دة منهج حياة لكل مشاكلك اللى تقابلك خاصة مشاكلك الشخصية
اما انك حتصبر وجواك حسن ظن بالتغيير
واما انك حتحاول تصلح لفترة معينة على قدر استيعابك
واما انك تفارق لانك مش حتتحمل
وف الاخر علينا اننا نفهم اننا كلنا عيوب لكن مستورين