هند عبد الغني تكتب: من بنت عبد الغنى لبنت ابو القمصان

من بنت عبد الغنى لبنت ابو القمصان ….
اعتقد الكل رد عليكى وعلى كلامك الاهوج حتى مشايخنا الاجلاء واخواتنا الاقباط الكل رد عليكى ….
بس فى شوية حاجات نفسى يوصلولك واتمنى لو تعرفى متهربيش وتجاوبى
عم ابو القمصان هل كان بيدى فلوس للوالدة علشان تتفضل بارضاعك ؟!
عم ابو القمصان هل كان بيجبلك مرضعة تقوم بارضاعك الحليب حتى تشبعى وتترعرعى ؟!
هل الست الوالدة كانت بالفعل علشان تقوم باطعامك كان لازم عم ابو القمصان يديها مقابل مادى ؟!
هل كان بيت عم ابو القمصان فيه الخدم والحشم والمرضعات علشان الست الوالدة قالت مثلا انا مش ملزمة باى حاجة ؟!
انا بسألك كدة علشان كلامك مش ممكن يكون وليد يوم وليلة …..
عم عبد الغنى والدى بقى لما اتولدنا لقينا نفسنا فى وسط شركة بين طرفين والدتى وعمك عبد الغنى ربنا يديمهم عليا نعمة لقيت الحقوق والواجبات بينهم متقسمة ( اوتوماتيك) من غير ما يقعدوا ويصرحوا او يكتبوا اللى ليهم واللى عليهم …ناس فاهمة يعنى ايه شراكة مدى الحياة …ناس متقبلة العيوب قبل المميزات
والست ياست يابنت عم ابو القمصان كانت ملزمة بكل ما تحمله الكلمة من معانى كانوا بيسموها ربة البيت لانها صاحبة البيت والراعية المسؤلة الاولى عنه ….
الست كانت فاهمة يعنى ايه ست وفاهمة ان ربنا فى تكوينه لجسدها ونفسيتها مكنش عبثى لا …كان لحكمة حتستمر معاها مدى الحياة
بتحمل وتسهر وتولد وترضع وتأكل بنفس راضية لان المنانة الحنانة مش ست دى حثالة المجتمع
ست يعنى سند مش ند …ست تسند وتعين وقت الضيق والشدة
ست عارفة امتى تكون ست البنات وامتى تكون بشخصية ١٠٠ راجل فى بعض
ست تكاتف اسرتها وقت المحن والضيق …ست يعنى نور البيت من غيرها الدنيا تضلم ….ست يعنى ام ابوها قبل ماتبقى ام لاولادها
ست مش اجيرة تشتغل بالساعة علشان تتقاضى فلوس على حبها ورعايتها ….
ياست يابنت ابوالقمصان يا اللى مش ملزمة انتى احنا كبرنا لقينا الست والراجل بيتباروا بخدمتهم لبيتهم واسرتهم بدون انتظار مقابل لان ربنا امر بكدة تيجى انتى على اخر الزمن فى الدنيا الصعبة على الأسر والبيوت تقولى الكلام الخبلان دة الله يهديكى لانك مهما حتجنى شهرة او غيره نتيجة كلامك اعرفى ان فى يوم حتقفى فيه لوحدك امام الملك امام الله وحتتحاسبى على كل كلمة قولتيها ….