جريدة القلم الحر المصرية جريدة القلم الحر المصرية www.qlm-hor.com موقع صحفى اخبارى متكامل
الاغنياء حرامية …. كتبت / هند عبد الغنى
متتعجبش لما اقول انى مشفقة على الطبقة الغنية ….وحقولك السبب!!
عشنا سنين وسنين وطبقة فى مصر عايشة اطلقوا عليها السياسيين والاقتصاديين” رمانة الميزان ”
وهى الطبقة المتوسطة اللى كانت دايما بتدعم الاقتصاد وناسه ….
الطبقة المتوسطة حاليا يطلق عليها طبقة ( طبقة عزيز قوم ذل ) لانها طبقة اتسحقت تحت عجلات التطور او التهور الاقتصادى حسب رؤية كل مواطن فالباقى بعد انهيار الطبقة المتوسطة طبقتين طبقة غنية جدا جدا
وطبقة فقيرة جدا جدا …
بالنسبة للفقراء اكيد طبعا وبلا اى شك فى حالة يرثى لها دى مش محتاجة كلام وحالتهم بتعبر عنهم ….
لكن متتعجبش لما اقول انى مشفقة على وضع الاغنياء جدا ليه !!!؟ لانى بقيت اسمع كتير من كل انسان بسيط او معدم جملة ..( أدى الاغنياء الحرامية اللى واكلين البلد ) …
فهل من الانصاف اننا نحقد على الغنى لمجرد انه غنى
الحقيقة اتعاملت مع شخصيات غنية اخلاقيا قبل ماتكون غنية ماديا والناس قمة فى الاخلاق والتواضع وناس بتقدم خير كتييير جدا وقدرها انها اجتهدت بطرق ما واصبحت غنية او ورثوا عن الاباء او او ….
ليه حكمنا على كل غنى انه حرامى!!
هل قلة حيلة !!؟
هل حقد طبقى!!؟
هل دة موروث قديم !!؟؟
هل طبيعة البشر كدة !!؟؟
وايا كان السبب …لازم نعرف انه حتى ف “الدين الغنى فضيلة والافتقار جريمة ”
يبقى لما نفكر نكره .. نكره الفقر مش الغنى ….
الفقر والفقير مطحونين ومسحولين لكن ايه ذنب انسان اختصه الله بالغنى بالحلال يخرج زكاته وبيساعد قدر استطاعته عنده املاك وعربية فخمة ولبسه كويس …هو لازم اظهر متبهدل..لا
” واما بنعمة ربك فحدث ”
هل الذنب الوحيد فى حياته اللى يكدر عيشته انه غنى!!
اتعودنا من صغرنا لما نشوف نعمة على انسان ندعيله بالزيادة والبركة ونقول ماشاء الله تبارك الله
فاللهم بارك لكل ذى نعمة وارزق اللهم وافرج على كل مكروب وارزقنا الستر
