برضو غالية .. بقلم حمدي يوسف

لما يصدح فيك
بعد الفجر طير ..

ولا نورك وف أصيلك
نخل طارح
يملا كل الدنيا خير

ولا يملا الكون عبيرك
و ف هواك عاش أسير

مهما كنت وكان زماني
يوم عسير ..

ولا شفت الغلب فيك
يملا قفه وألف زير

ولا عايش جمب نيلك
جوا خص وكان صغير

لما يعلا صوت آذانك
ولا شارد م البرية
مره ينفخ من شروره
الف كير ..

برضو غالية ..

وف هواك الزاد بيحلا
للفقير

والمسافر والمهاجر
واللي عايش بره أرضك
للحضارة كان سفير

برضو غالية ..

مهما فاسد ولا سارق
ولا شارد أو حقير

يسرق الفرحه ف وجودك
ولا مره للغوازي كان غفير

برضو غالية..

لما يصدح فيك
بعد الفجر طير

ولا نور الشمس
بعد العتمه
تاني ..
يملا كل الدنيا خير