جريدة القلم الحر المصرية جريدة القلم الحر المصرية www.qlm-hor.com موقع صحفى اخبارى متكامل
بلون القمح أنا مصري
هنا إتكونت
هنا إتعلمت
هنا مدرستي وده فصلي
محفور على التخته كان إسمي
وبالطباشيرة ياما كتبت
وشيلت الشنطة على ظهري
بلون القمح أنا مصري
☆☆☆☆
هنا لعبنا
هنا كبرنا
هنا إتربيت أنا و أختي
وعشت معاها فى طفولتي
وده شارعنا و منطقتي
و ده الجامع الي فيه صليت
ودى كنيسة مينا صاحبي
بلون القمح أنا مصري
☆☆☆☆
يا شمس أصيلة بتدفى
يا نبع حنان و بر أمان
يا ذكرى زمان وحضن الأم
يا عمري الجاي و الحصري
بلون القمح أنا مصري
☆☆☆☆
سماها شال يغطيني
ومايه نيلها ترويني
ومهما بعدت و إتغربت
يزيد أشواقي و حنيني
وأرجع لبلدى و لأصلي
بلون القمح أنا مصري
☆☆☆☆
علمها تاج على راسي
ترابها حتة من جسمي
تراب طاهر ما ينداس
برجل الخاين النخاس
ولو هوب وكان ناسي
هيلقى قبره مستني
بلون القمح أنا مصري
☆☆☆☆
شايفك بقلبي و بحسي
هواكي عليل يرد الروح
تسافر قبلي أو بحري
تلاقي الخير منين ما تروح
مشهورة بكرمك المصري
بلون القمح أنا مصري
☆☆☆☆
بتاريخ أجدادي أنا هاحكى
عن مصر و أغني لو بابكى
نشيد بلادى لكي حبي
أفديكي بروحي و بنفسي
إسمك فى دمي ده بيسري
بلون القمح أنا مصري
بلون القمح أنا مصري
كلمات
هاني فتوح
