الرئيسية / مقالات رجب عبد العزيز / رجب عبد العزيز يكتب: نريد دستور يجعل مدة الرئاسة مدى الحياة(و)تغيير الشعب كل(4)سنوات

رجب عبد العزيز يكتب: نريد دستور يجعل مدة الرئاسة مدى الحياة(و)تغيير الشعب كل(4)سنوات

عدنا للانقسامات . هناك فريق معارض وفريق مؤيد .
هناك مؤيدين ومعارضين لتعديل الدستور . بالإيحاء – والظهور .
ومؤكد ان كثيرا منهم لم يقرأ ولو مادة واحدة من هذا الدستور ..
ومعظم المتخصصين(فى بيات شتوي)ومعظم الشعب(ملهي في لقمة العيش)
فماذا قالوا المؤيدين والمعارضين ؟
نبدأ بالمعارضين فقالوه : —
الآلهة لا تموت
—————–
بمناسبة تعديل الدستور..عندى تساؤلات مشروعة هو الدستور مفعل اصلا؟؟؟؟ يعنى احنا كمواطنين دافعنا عن حقوقنا الثابتة فيه اصلا؟؟

الدستور بيقول يناير ثورة مجيدة .. والمطبلاتية وإعلام العار بيقول نكسة يناير

الدستور بيقول حرية الرأى مكفولة.. والصحفيين واأصحاب الرأى ورموز المعارضة فى السجون

الدستور بيقول حياة كريمة والناس بتنتحر كل يوم على قضبان المترو من الفقر

الدستور بيقول محمياتنا وبحارنا مصونة والسعودية اخدت جزيرتين تعملهم متتجع تنافس بيه شرم الشيخ وتمد جسر يوصل شرم وتزرع بيه رجل للسعودية فى قلب افضل مكان فى مصر.

الدستور بيقول حق العمل مكفول والشباب ملطع على النواصى والقهاوى

الدستور بيقول الحق فى التنظيم… وبين كل خمسة تلاتة مخبرين

الدستور بيحمى حقوق الانسان والنظام بيرفع قضايا ضدهم وبيتقبض على إللى بيشتغل منهم والامنجية بيقولوا عنهم عملاء وقبيضة

الدستور بيقول حرية تكوين الأحزاب والأمن بيحاصر مقراتها ويقبض على الأعضاء من بيوتهم.

الدستور بيقول حق الخصوصية وسرية المكالمات الهاتفية…والبرامح فى الفضائيات بتعرض على الهواء مكالمات شخصية وشات مكتوب للمعارضين

الدستور بيقول الحق فى العدالة الاجتماعية.. و في ناس مرتبها ١٠٠ الف وناس مرتبها الف جنيه والبيضة بجنيه ونص وناس مش عارفة تطلع معاش ٣٧٥ ج

الدستور بيقول حظر التهجير القسرى والدولة نفسها هى إللى هحرت مسيحيى العريش ومارجعوش تانى.. بلاش العريش علشان الإرهاب..طيب والتهجير القسرى لاهالى الوراق ونزلة السمان والمسيحيين فى العامرية والصعيد لما بتحصل فتن طائفية

الدستور بيقول حرية العقيدة مكفولة. وإقامة الشعائر الدينية مصانة.. والكنايس بتتحدف بالطوب وتتقفل بحماية الامن.. .وسايبين برهامى ينشر سمومه

الدستور بيقول الرئيس انسان والمطبلاتية احتاروا ما بين انه مخلص ورسول.

الدستور بيقول يقعد اربع سنين ووناس تقول  يقعد ١٠٠ سنة

عارفين ليه قادرين يغيروه؟ علشان الناس اختارت اختيارات برلمانية غلط من الاول ..عارفين ليه.؟ علشان الناس لسه محتاجة تعليم ووعى وشبع علشان تقدر تقول لاء . علشان تفهم ان الرئيس مش اله ومش نص اله وليس له صفة الخلود..علشان تفهم ان مصر مش قايمة على فرد..مصر أكبر من اى حد.. فرعون وقع بجيوشه فى قلب البحر وفضلت مصر.. الدستور.. بيتعدل علشان السيسي يقعد.. طيب لو لا قدر الله مرض أو مات مصر هاتضيع؟؟..اكيد لاء.. اوبااا انا اسفة نسيت .. الآلهة لا تموت….. خسارة والف خسارة

ملحوظة: نص المعارضين وثوار يناير اتسجن فى تيران وصنافير والنص التانى هايتسجن فى تعديل الدستور

#ارفض_تعديل_الدستور ……
———
وقال المؤيدين : –
[[#الدستورفيالاجنده]]

بالراحة بس كده… تعالى نحسبها مع بعض…!!!

⏸كنت تعرف السيسي قبل ٢٠١٢…!!؟؟ كنت تعرف إن في حد بيتجهز من ٥٠ سنه للفترة دي…!!!؟؟؟

((زي ما في صورة لماكرون ٦ سنوات مع زوجته الحالية… في صورة السيسي ٦ سنوات رفقة الرئيس ناصر..!!!))

((بقالي ٥٠ سنه ب اتعلم يعني إيه دولة))

◀كنت تتوقع إن الراجل ده ينهي أسطورة الصهاينة في المنطقة..!!؟؟

◀طب كنت تتوقع إن ممكن بلدك تشتعل في أكتر من ٣٠٠٠ مشروع قومي في وقت واحد…!!!؟؟

✋كل ده وغيره… كان غير متوقع… ولا في الخيال حتى…

وكل ده حصل من غير ما سيادتك تبذل نقطة عرق حتى..!!

🚫كل اللي كان مطلوب من حضرتك هو إنك تمسك علم مصر في ايدك وتنزل تحتفل وتقول تحيا مصر في ٣٠ يونيو ٢٠١٣…!!! وشوية صبر على الظروف الإقتصادية الصعبه!!

⏮جاي النهاردة بقى وعاوز تقنعني إن حضرتك خايف ع البلد أكتر من الناس دي…!!!!

⏮جاي النهاردة وعاوز تقنعني إن شوية أعضاء في مجلس الشعب كل خبرتهم في الحياة جمع الأصوات… عاوز تقنعني أنهم ممكن يضحكوا ع الناس دي ويمرروا مواد في التعديلات ضد البلد…!!!!

✋من الآخر بس… عشان نكون واضحين… مصر تدار ب إدارة تانيه خالص غير اللي احنا شايفينها قدامنا دي…!!!!

⛔مع احترامي لمجلس الشعب والوزارات ووووو إلخ… كل دول شكليات لاكتمال نموذج الدولة…!!!!

◀وكلنا شايفين الوزراء والمحافظين (بيهنجوا) من الريس لما يتقل عليهم شوية في الشغل…!!!!

◀وكلنا شايفين بعض أعضاء مجلس الشعب أصحاب المقترحات الفكاهية… لولا الكتله التي كونها المرحوم سامح سيف اليزل… واللي استحالة تمرر أي تعديل إلا ما يتوافق مع رؤية الإدارة…!!!!

🔸عاوز أقول… نتكلم… نقترح… نهرج… نختلف… نتفق…

((كل ده ماشي…!!!!))

⛔إنما قولا واحدا…. مصر في أيدي رجال صدقوا ما عاهدوا الله وعاهدوا الوطن عليه… لا يعنيهم إلا الوطن والشعب… ولن يتم إلا ما تم تجهيزه… واقول تجهيزه منذ سنوات…!!!!

◾إدارة مصر تعمل ب اجندات سابقة التجهيز:

اجنده سياسية… اجنده اقتصادية..اجنده تشريعية… إلخ..!!

((ولن يحيدوا عنها أبدا….!!!!!))

⏮كل اللي علينا ننتظر إشارة الرئيس المعتاده في الظروف اللي زي دي… والريس معودنا على الصراحة… ناخد منه الإشارة ونتعامل بناءا عليها…!!!

((ما تسمعوش غير مني أنا))

🔷الرئيس السيسي:

((الإصلاح سيتم… رضيتم أو لم ترضوا… ف انني ساقابل الله به))

✋رفعت الأقلام…. وجفت الصحف..✋

#مصر_متأمنه …
——————–
وعن رأيي الشخصي باختصار ومن الأخر
نريد تعديل للدستور ان
يجعل مدة الرئاسة مدى الحياة  . وتغيير الشعب كل أربع سنوات .
(ونفضها سيرة)

رجب عبد العزيز

 

 

 

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: