الرئيسية / أشعار وقصص وروايات / الدستور – بقلم / محمد الجندي
محمد الجندي

الدستور – بقلم / محمد الجندي

إضحك كإنك لسه عيل خام

وابكى كإن الدنيا مقلوبه

آمن عشان تقدر على الأيام

إن الحاجات فى الأصل مكتوبه

وإن الذنوب عادى لو بعدها توبه

وإن الحياه مليانه ناس ووشوش

وإن الحقيقه أوقات بتبقى شئ مغشوش

وإن البراح على قد مد الإيد

وإن القيود مش شرط تبقى حديد

وإن السند ممكن فى مره يكسرك

وإن الطرق على كترها  – مش شرط برده توصلك

وإن الشيطان فينا .. بيجرى مجرى الدم

فطبيعى يلهينا .. مابين بلاوى وهم …

ويكفر المجاريح

لكنه شئ أضعف من ريشه وسط الريح

وإن الحياه أمواج وقلوبنا دى سفينه

والبحر بلا مرسى – والشط بلا مينا

واللعبه متواصله ومعانا للآخر

فلازم كل يوم نلعب – ولازم كل يوم خاسر

لكن ياصاحبى أكيد ..لازم تكون فاكر

) ربك رحيم جداً وبإيده يهدينا (

يارب قوينا

طلعنا منها سُلام

إضحك كإنك لسه عيل خام

 

الشاعر/ محمد الجندي

 

اترك تعليقاً

لن يتم نشر عنوان بريدك الإلكتروني.

This site uses Akismet to reduce spam. Learn how your comment data is processed.

%d bloggers like this: